UGÑAS ARENOLA KONgEST

UGÑAS ARENOLA KONgEST

Tigahigop ni Bichek an saiyang cafe mantang nacahiling sa luwas can vintana.

‘Turotaod-taodon ta sana ta maabot naman si Voljas.’ Sabi ni Touran.



Sa paghangos qui hararom ni Bichek, luminuwas an saradit na agui can aso sa saiyang dugño. Tigahiling ini ni Touran casubago pa. Minsan napaghuna niya na bagay sa sungay buda mapupulang cublit ni Bichek an paghangos ning nag-aaraso-aso.

‘Ano man nanggad palan an iduduman ta ta casu nacaaguing semana pa camo qui caugop-ugop?’ Hapot niya kay Touran.



‘Ugñas Arenola Awarding baga ngonian.’ Simbag ni Touran.



‘Ano ngonian?’

‘Caipuhan tang mag-attender ta yaon duman an nagcapirang parasurat can Diacolnon.’

‘Buda?’

‘Buda—makatabang lamang kita sa paggibo qui tupperware sainda. Mas dacol na dayo an macacaduman mas dacol na tupperware sindang maguiguibo.’

‘Linticusan na tupperware an. Paghuna co baga competizion qui literaturang diacolnon an Ugñas Arenola na an.’

‘Nag-iyo ka baga casu sarong semana pa.’ Ini na sana an nasabi ni Touran.



‘Bata ticacajuaton na naman aco qui d0ta ngonian.’ Huminiling giraray sa luwas ki vintana si Bichek.

Huminiling man sa luwas si Touran asin napahiling siya sa reflecion can saiyang pandoc sa salming.

Gamadja.

‘Ano palan an na dara-dara mo?’ Hapot ni Bichek kay Touran.



‘Ini?’ sabay presentar can saiyang capot-capot na clearbuk. ‘Mga piktyurs mi ini last year.’ Hiniling ni Bichek an mga nasa litrato.

‘Mga Americano sinda?’

‘Baco man, gñata?’

‘Haralangcawon baga an saindang mga dugño.’

‘Ah, iyan? Natural lang an.’

‘Sisay an mga alien na ini?’ sabay turo sa nagcapirang daracula an payo buda garo sa cuwago an mga mata.

‘Uy—huwag ka namang ganyan. May mga hydrocephalus lang sinda. And for your info, sinda su mga nanggarana na buda manggagarana pa sana sa contest na ini.’

‘Ah—caya palan.’ Sa pagbuclit pa ni Bichek can mga litrato can nasabing contest, halos parareho man sana an nagcahiriling nya.

‘Ining saro nata may brace sa liog?’

‘Iyan su nasobrahan ki paghiling sa sadiri. Nangyari daa an casu napaagi siya sa salming.’

‘Wahahahaa—’ halos matigbac sa cauuloc si Bichek sa sarong litrato na nahiling niya na icinacigcig ni Touran.



‘Nata mo man ini tig-ulocan?’ Hapot ni Touran sabay hiling sa litrato.

‘Garo sya pekeng albularyo. Hahahaa…’

‘Peke?’

‘Iyo. Hilinga man daw.’

Sa litrato may sarong caballo na may bandana sa payo.

‘Okey man lang baga.’ Sabi ni Touran .



‘Garo baga siya nagahanap qui hinete na mapaugma saiya sa piktyur na an.’

‘Aram mo Bich. Wara na citang pacilabot sa love life niya ang importante cung ano an nacontribuar niya sa literaturang diacolnon.’

‘Ano man ngaya an nacontribuar can tigidig na an, aber?’

‘Correcion. Baco tigidig an pangaran ca an, Sea Bizkit.’

‘Okey. Okey. Okey.’

‘Nabasa mo na an libro niyang Bukang Bukaka?’

‘Dae pa. Pero sa tanog pa sana, ilibugan na ako.’

‘Pasublion taca can copia ko.’ Sa boot-boot ni Touran; sana dai pa ini naipampunas ta sa laog qui banyo niya ini tigabasa.

Sa catahawan can paghuhuron can magka-amigo may luminaog na ukay.

‘Nagtext sinda saco.’ Sabi can ukay. Pagalon, siguro sa kaduro-dalagan, si Voljas na warang capuro-punggod.

‘Sisay nagtext?’ Hapot ni Bichek.

‘Ano daa ang tinext?’ Hapot ni Touran.



Tuminukaw an ukay sa bakanteng silya harani sainda.

‘Okey ka lang Voljas?’ Hapot giraray ni Touran.



Nagaluha-luha si Voljas.

‘Finalist man sana daa ako.’

‘Ano?! Paghuna ko baga gana ka!’ Sabi ni Touran.



‘Mala baga…’

‘Mala ano?!’

‘Caipuhan daa ngunang paganahon an mga taga-duman kaysa sa mga taga-digdi.’